Search
Monday 26 August 2019
  • :
  • :

ದೇವರಾಯನ ದುರ್ಗ

ಶ್ರೀ ಕರಿಗಿರಿ ಕ್ಷೇತ್ರವೆಂದು ದೇವರಾಯನ ದುರ್ಗವು ಪ್ರಸಿದ್ಧವಾಗಿದೆ. ತುಮಕೂರು ಪಟ್ಟಣಕ್ಕೆ ಈಶಾನ್ಯ ದಿಕ್ಕಿನಲ್ಲಿ ಹತ್ತು ಮೈಲಿಗಳ ದೂರದಲ್ಲಿ ಮತ್ತು ಬೆಂಗಳೂರು ನಗರದಿಂದ ವಾಯವ್ಯ ದಿಕ್ಕಿನಲ್ಲಿ ೪೪ ಮೈಲಿಗಳ ದೂರದಲ್ಲಿ ಈ ಪುಣ್ಯಕ್ಷೇತ್ರವು ಇದೆ. ಈ ಕ್ಷೇತ್ರದ ಸುತ್ತಲೂ ಬೆಟ್ಟ ಗುಡ್ಡಗಳು ತುಂಬಿವೆ.

ಭೋಗಾಲಕ್ಷ್ಮೀ ನರಸಿಂಹ ಸ್ವಾಮಿಯವರ ದೇವಸ್ಥಾನ

ದೇವರಾಯನ ದುರ್ಗದ ಮಧ್ಯಭಾಗದಲ್ಲಿ ಶ್ರೀ ಭೋಗಾ ಲಕ್ಷ್ಮೀನರಸಿಂಹ ಸ್ವಾಮಿಯವರ ದೇವಸ್ಥಾನವು ಪೂರ್ವಾಭಿಮುಖವಾಗಿ ಸ್ಥಾಪಿತವಾಗಿದೆ. ಈ ದೇವಸ್ಥಾನವು ಗರ್ಭಾಂಕಣ, ನವರಂಗ, ಮುಖ ಮಂಟಪ, ಪ್ರಾಕಾರ ಮತ್ತು ರಾಜ ಗೋಪುರ ಎಂಬ ಐದು ಅಂಗಗಳಿಂದಲೂ ಪರಿಪೂರ್ಣವಾಗಿ ನಿರ್ಮಿತವಾಗಿದೆ.

ಈ ದೇವಸ್ಥಾನದಲ್ಲಿ ಇರುವ ಶ್ರೀ ಲಕ್ಷ್ಮೀನರಸಿಂಹ ಸ್ವಾಮಿಯವರು ದೂರ್ವಾಸ ಮಹರ್ಷಿಗಳಿಂದ ಸ್ಥಾಪಿಸಲ್ಪಟ್ಟು ಆರಾಸಲ್ಪಟ್ಟವರಾಗಿರುತ್ತಾರೆ. ಇದು ಪರಮ ತೇಜೋಮಯ ವಿಗ್ರಹವಾಗಿರುತ್ತದೆ. ಶ್ರೀ ನರಸಿಂಹ ಸ್ವಾಮಿಯು “ಸರ್ವತೋಮುಖದುರ್ವಾರ ತೇಜೋ ವಿಕ್ರಮಶಾಲಿ” ಎಂಬುದಾಗಿ ಪುರಾಣಗಳಲ್ಲಿ ಸ್ತುತಿಸಲ್ಪಟ್ಟಿರುವುದು ಎಷ್ಟು ಅರ್ಥ ಮತ್ತು ಭಾವ ಗರ್ಭಿತವಾಗಿದೆ ಎಂಬುದು ಈ ದೇವತಾ ಮೂರ್ತಿ- ಯನ್ನು ದರ್ಶನ ಮಾಡಿದ ಕೂಡಲೇ ಭಕ್ತ ಜನರಿಗೆ ವೇದ್ಯವಾಗುತ್ತದೆ. ಶ್ರೀ ಸ್ವಾಮಿಯವರ ದೇವಸ್ಥಾನದಲ್ಲಿ ಅಮ್ಮನವರ ಸನ್ನಿಯು ಪ್ರತ್ಯೇಕವಾಗಿ ಇದೆ.

ಶ್ರೀ ಲಕ್ಷ್ಮೀದೇವಿಯು ಅಮ್ಮನವರ ಗುಡಿಯ ಗರ್ಭಾಂಕಣದಲ್ಲಿ “ಪ್ರಸನ್ನ ಲಕ್ಷ್ಮೀ”ಯಾಗಿ ಕುಳಿತಿದ್ದಾಳೆ.

ದೇವಸ್ಥಾನದ ಹಿಂಭಾಗದಲ್ಲಿ ದೊಡ್ಡ ಪುಷ್ಕರಣಿ ಇದೆ. ದೇವಸ್ಥಾನದ ಮುಂಭಾಗದಲ್ಲಿ ವಿಶಾಲವಾದ ರಥಬೀದಿ ಇದೆ.

ದೂರ್ವಾಸರು ಈ ಪುಣ್ಯಕ್ಷೇತ್ರದಲ್ಲಿ ಸಾವಿರಾರು ವರ್ಷ ತಪಸ್ಸು ಮಾಡಿದ್ದಾರೆ. ಅವರಿಗೆ ಶ್ರೀಲಕ್ಷೀ ನರಸಿಂಹ ಸ್ವಾಮಿಯವರು ಪ್ರತ್ಯಕ್ಷವಾದ ಸ್ಥಳದಲ್ಲಿಯೇ ಈಗ ಶ್ರೀ ಭೋಗಾಲಕ್ಷ್ಮೀ ನರಸಿಂಹ ಸ್ವಾಮಿಯವರ ದೇವಸ್ಥಾನವು ಇದೆ. ಆದುದರಿಂದ ಶ್ರೀ ಭೋಗಾಲಕ್ಷ್ಮೀ ನರಸಿಂಹ ಸ್ವಾಮಿಯವರು ದೂರ್ವಾಸ ಮಹರ್ಷಿಗಳಿಂದ ಪ್ರಪ್ರಥಮವಾಗಿ ಆರಾಸಲ್ಪಟ್ಟಿರುತ್ತಾರೆ.

ದೂರ್ವಾಸರು ಒಂದು ಸಲ ಗಂಗಾಸ್ನಾನ ಮಾಡಬೇಕೆಂದು ಅಪೇಕ್ಷಿಸಿದಾಗ ಶ್ರೀ ಗಂಗಾಮಾತೆಯು ದೂರ್ವಾಸರಿಗೆ ಪ್ರತ್ಯಕ್ಷಳಾಗಿ “ನಾನು ಶ್ರೀನರಸಿಂಹ ತೀರ್ಥದಲ್ಲಿಯೇ ಇದ್ದೇನೆ. ನೀನು ಇಲ್ಲಿಯೇ ಗಂಗಾಸ್ನಾನ ಮಾಡಬಹುದು” ಎಂದು ಹೇಳುತ್ತಾಳೆ. ಶ್ರೀ ಗಂಗಾದೇವಿಯು ದೂರ್ವಾಸರಿಗೆ ಪ್ರತ್ಯಕ್ಷವಾದ ಸ್ಥಳದಲ್ಲಿ ಕಾಶೀತೀರ್ಥವೆಂಬ ಪುಣ್ಯತೀರ್ಥ ಇದೆ.

ಶ್ರೀ ಕರಿಗಿರಿ ದುರ್ಗಕ್ಕೆ ಕುಸುಮಾದ್ರಿ ಎಂಬ ಹೆಸರು ಚಿರಪರಿಚಿತವಾಗಿದೆ. ಶ್ರೀ ಮಹಾವಿಷ್ಣುವು ಲೋಕ ಕಂಟಕನಾಗಿದ್ದ ಪುಂಡರೀಕನೆಂಬ ರಾಕ್ಷಸನನ್ನು ಈ ಕ್ಷೇತ್ರದಲ್ಲಿ ಸಂಹಾರ ಮಾಡಿದಾಗ ಎಲ್ಲ ದೇವತೆಗಳೂ ಆಕಾಶದಲ್ಲಿ ಬಂದು ನಿಂತು ಜಯಕಾರ ಮಾಡಿ ಶ್ರೀಮನ್ನಾರಾಯಣನ ಮೇಲೆ ಪುಷ್ಪವೃಷ್ಟಿಯನ್ನು ಮಾಡಿದಾಗ ಈ ಪುಣ್ಯಕ್ಷೇತ್ರವೆಲ್ಲವೂ ಹೂವುಗಳಿಂದ ತುಂಬಿ ಹೋಯಿತು. ಅದನ್ನು ನೋಡಿದ ಮಹರ್ಷಿಗಳು ಈ ದುರ್ಗವನ್ನು ಕುಸುಮಾದ್ರಿ ಎಂದು ಕರೆದರು.

ಯೋಗಾನರಸಿಂಹ ಸ್ವಾಮಿ ದೇವಸ್ಥಾನ

ದೇವರಾಯನ ದುರ್ಗದಲ್ಲಿ  ಸಮುದ್ರ ಮಟ್ಟದಿಂದ ೪೨೦೦ ಅಡಿ ಎತ್ತರದಲ್ಲಿ ಬೆಟ್ಟವೊಂದಿದೆ. ಈ ಗಿರಿ ಶೃಂಗದಲ್ಲಿ ಬ್ರಹ್ಮ ದೇವರಿಂದ ಸ್ಥಾಪಿತವಾಗಿರುವ ಶ್ರೀ ಲಕ್ಷ್ಮೀನರಸಿಂಹ ಸ್ವಾಮಿಯ ದೇವಸ್ಥಾನವಿದೆ. ಈ ದೇವರನ್ನು ಶ್ರೀ ಯೋಗಾಲಕ್ಷ್ಮೀನರಸಿಂಹ ಸ್ವಾಮಿ ಎಂದು ಕರೆಯುತ್ತಾರೆ. ಈ ದೇವಸ್ಥಾನವು ಗರ್ಭಾಂಕಣ, ನವರಂಗ, ಮುಖ ಮಂಟಪ, ಪ್ರಾಕಾರ ಮತ್ತು ರಾಜಗೋಪುರ ಎಂಬ ಐದು ಅಂಗಗಳಿಂದಲೂ ಪರಿಪೂರ್ಣವಾಗಿದೆ. ಶ್ರೀ ಸ್ವಾಮಿಯವರ ಸನ್ನಿಧಾನವು ಉತ್ತರಾಭಿಮುಖವಾಗಿದೆ. ಅಮ್ಮನವರ ಸನ್ನಿಧಾನವು ಪೂರ್ವಾಭಿಮುಖವಾಗಿದೆ. ಕೆಳಗಿನ ಬೆಟ್ಟದ ದೇವಸ್ಥಾನಕ್ಕೂ ಮೇಲಿನ ಬೆಟ್ಟದ ದೇವಸ್ಥಾನಕ್ಕೂ ಒಂದು ಮೈಲಿಯ ಅಂತರವಿದೆ. ಕೆಳಗಿನ ಬೆಟ್ಟಕ್ಕಿಂತಲೂ ಮೇಲಿನ ಬೆಟ್ಟವು ೫೦೦ ಅಡಿ ಎತ್ತರವಾಗಿದೆ.

ದೇವರಾಯನ ದುರ್ಗದ ಸ್ಥಳ ಪುರಾಣವನ್ನು ಕರಿಗಿರಿ ಮಹಾತ್ಮೆ ಎಂಬುದಾಗಿ ಕರೆಯುತ್ತಾರೆ. ಇದು ಬ್ರಹ್ಮಾಂಡ ಪುರಾಣಾಂತರ್ಗತವಾಗಿ ಇರುತ್ತದೆ. ಶ್ರೀ ಕರಿಗಿರಿ ಮಹಾತ್ಮೆಯು ೧೨ ಅಧ್ಯಾಯಗಳಿಂದ ಕೂಡಿದೆ.

      ಅಸ್ತೇ ಕರಿಗಿರಿಃ ಕಶ್ಚಿತ್ ತ್ರಿಭಿಃ ಶೃಂಗೈಃ ಸಮುಚ್ಛ್ರಿತಃ ||
      ಶೇಷ ಸಿಂಹಗಜಾಕಾರಃ ಖಗೇಂದ್ರ ಇವ ದೃಶ್ಯತೇ ||

ಎಂಬ ಮೊದಲನೆಯ ಅಧ್ಯಾಯದ ೨೭ನೇ ಶ್ಲೋಕವು ಈ ಪುಣ್ಯ ಕ್ಷೇತ್ರದಲ್ಲಿ ಮೂರು ಶಿಖರಗಳು ಇರುತ್ತವೆ ಎಂದೂ, ಈ ಬೆಟ್ಟವು ನಾಲ್ಕು ರೂಪಗಳಲ್ಲಿ ಕಾಣಿಸುತ್ತದೆಂದೂ ಹೇಳುತ್ತದೆ.

  ಅಹಂ ಭುವಂ ಸಮಾಸಾದ್ಯ ಕ್ರೀಡಾರ್ಥಂ ದೈವತೈಸ್ಸಹಃ |
      ಬ್ರಹ್ಮಾದ್ಯೈಃ ಪೂಜಿತೋ ನಿತ್ಯಂ ತಿಷ್ಠಾಮಿ ವಸುಧಾತಲೇ ||

ಎಂಬ ಎರಡನೆಯ ಅಧ್ಯಾಯದ ೫ನೇ ಶ್ಲೋಕವು ಭೂ ಲೋಕದಲ್ಲಿ ತಾನು ಬಂದು ನಿಲ್ಲಬೇಕೆಂದು ಭಗವಂತನು ಮಾಡಿದ ಸಂಕಲ್ಪವನ್ನು ಹೇಳುತ್ತದೆ. ಅನಂತರದಲ್ಲಿ ಭಗವಂತನು ಬ್ರಹ್ಮ ದೇವನಿಗೆ ಆಜ್ಞೆಯನ್ನು ಮಾಡುತ್ತಾನೆ. ಭಗವದಾಜ್ಞೆಯಂತೆ ಬ್ರಹ್ಮದೇವನು ಶ್ರೀ ಕರಿಗಿರಿ ಕ್ಷೇತ್ರಕ್ಕೆ ಬಂದು ಭಗವಂತನನ್ನು ಕುರಿತು ಹತ್ತು ಸಾವಿರ ವರ್ಷ ತಪಸ್ಸು ಮಾಡುತ್ತಾನೆ.

ಭಗವಂತನ ಶ್ರೀ ನೃಸಿಂಹ ರೂಪವನ್ನು ಕುರಿತು ಬ್ರಹ್ಮ ದೇವನು ಹತ್ತು ಸಾವಿರ ವರ್ಷ ತಪಸ್ಸು ಮಾಡಿದನು ಎಂಬುದಾಗಿ ಎರಡನೆಯ ಅಧ್ಯಾಯದ ೧೨ನೆಯ ಶ್ಲೋಕವು ಹೇಳುತ್ತದೆ. ಆದುದರಿಂದ ಈ ಪುಣ್ಯ ಕ್ಷೇತ್ರವು “ನಾರಸಿಂಹ ಕ್ಷೇತ್ರ”ವಾಯಿತು. ಹತ್ತು ಸಾವಿರ ವರ್ಷಗಳ ಕಾಲ ಬ್ರಹ್ಮ ದೇವನು ತಪಸ್ಸು ಮಾಡಿದ ಮೇಲೆ ಭಗವಂತನು “ಶ್ರೀ ಲಕ್ಷ್ಮೀ ನೃಸಿಂಹ” ಸ್ವರೂಪದಿಂದ ಬ್ರಹ್ಮ ದೇವನಿಗೆ ಪ್ರತ್ಯಕ್ಷನಾಗುತ್ತಾನೆ.

ಆಗ ಬ್ರಹ್ಮ ದೇವನು,

ನತೋತ್ಮ್ಯನಂತಾಯ ದುರಂತ ಶಕ್ತಯೇ |
            ವಿಚಿತ್ರ ವೀರ್ಯಾಯ ಪವಿತ್ರ ಕರ್ಮಣೇ ||

      ವಿಶ್ವಸಸ್ಯರ್ಗ ಸ್ಥಿತಿ ಸಂಯಮಾನ್ ಗುಣೈಃ |
            ಸ್ವಲೀಲಯಾ ಸಂವಿಧಾಧೇಽವ್ಯಯಾತ್ಮನೇ ||

ಎಂಬುದಾಗಿ ಭಗವಂತನ ಗುಣ ವಿಕ್ರಮಗಳನ್ನು ಸ್ತುತಿಸಿ

     ನಮೋ ನೃಸಿಂಹಾಯ ವರಪ್ರದಾಯ |
            ಭಕ್ತಾನುರಾಗಾಯದಿವಿ (ಸು) ಮುಕ್ತಿದಾಯ ||

      ಸುರಾಸುರಾಣಾಂ ವಿಭವಾಯ ತುಭ್ಯಂ |
            ಲಕ್ಷ್ಮೀಧರಾಯಾಽಖಿಲ ಪೂಜಿತಾಯ ||

ಶ್ರೀ ಪರಾಶರ ಮಹರ್ಷಿಗಳು ಪುತ್ರ ಸಂತಾನಾಪೇಕ್ಷೆಯಿಂದ ಈ ಪುಣ್ಯ ಕ್ಷೇತ್ರದಲ್ಲಿ ಶ್ರೀ ನೃಸಿಂಹ ತೀರ್ಥದ ಈಶಾನ್ಯ ಭಾಗದಲ್ಲಿ ಕುಳಿತು ಒಂದು ಸಾವಿರ ವರ್ಷ ತಪಸ್ಸು ಮಾಡಿದ ಮೇಲೆ ಶ್ರೀ ಭಗವಂತನು ಪ್ರತ್ಯಕ್ಷನಾಗುತ್ತಾನೆ. ಆಗ ಪರಾಶರ ಮಹರ್ಷಿಗಳು,

ನೃಸಿಂಹಾಯ ನಮಸ್ತುಭ್ಯಂ ವಜ್ರದಂಷ್ಟ್ರಾಯತೇ ನಮಃ |
ವಾಸುದೇವಾಯ ಶಾಂತಾಯ ಗೋವಿಂದಾಯ ನಮೋ ನಮಃ ||

ಎಂಬುದಾಗಿ ಸ್ತುತಿಸುತ್ತಾರೆ.

ಅನಂತರ “ವರಂ ವರಯ ಭದ್ರಂತೇ” ಎಂಬುದಾಗಿ ಸ್ವಾಮಿಯು ಹೇಳಿದಾಗ.

“ನೀನು ನನ್ನ ಪುತ್ರನಾಗಿ ಅವತರಿಸು ಎಂಬುದಾಗಿ ಅಪೇಕ್ಷಿಸುತ್ತಾರೆ”. ಅದರಂತೆ ಶ್ರೀ ಭಗವಂತನು ತನ್ನ ಜ್ಞಾನಾಂಶದಿಂದ ಶ್ರೀ ಪರಾಶರ ಮಹರ್ಷಿಗಳ ಪುತ್ರನಾಗಿ ಜನಿಸಿ ವ್ಯಾಸ ಮಹರ್ಷಿಗಳಾಗಿರುತ್ತಾರೆ.

ಧನುಸ್ತೀರ್ಥ

ದೇವದತ್ತ ಮತ್ತು ಧನಂಜಯ ಎಂಬ ಇಬ್ಬರು ಗಂಧರ್ವರು ಇದ್ದರು. ಅವರು ಬಹಳ ಯಶೋವಂತರಾದ ಸಂಗೀತಗಾರರಾಗಿದ್ದರು. ಬ್ರಹ್ಮ ಸಭೆಯಲ್ಲಿ ಒಂದು ದಿವಸ ಅವರ ಸಂಗೀತ ಕಾರ್ಯಕ್ರಮ  ನಡೆಯಿತು. ಆ ಸಭೆಯಲ್ಲಿ ಭೃಗು ಮಹರ್ಷಿಗಳೂ ಇದ್ದರು. ಸಂಗೀತದ ವಿಚಾರವಾಗಿ ಚರ್ಚೆ ನಡೆಯಿತು. ಆಗ ಗಂಧರ್ವರು “ಫಲಾಶಿನಸ್ತವ ಋಷೇ ಕಲಾ ವಿದ್ಯಾ ಕುತೋಬತ?”

ಎಂದರೆ “ಹಣ್ಣು  ಹಂಪಲು ತಿನ್ನುವ ಮುನಿಯಾದ ನಿನಗೆ ಸಂಗೀತ ಕಲಾವಿದ್ಯೆಯು ಬರುತ್ತದೆಯೇ?” ಎಂದು ಕೇಳಿಬಿಟ್ಟರು.

ಆಗ ಭೃಗು ಮಹರ್ಷಿಗಳಿಗೆ ಸಿಟ್ಟು ಬಂದು ಅವರು ದೇವದತ್ತನಿಗೆ “ನೀನು ಮದಿಸಿದ ಆನೆಯಾಗು” ಎಂದೂ ಧನಂಜಯನಿಗೆ “ನೀನು ಕಲ್ಲು ಬಂಡೆಯಾಗು” ಎಂಬುದಾಗಿಯೂ ಶಾಪ ಕೊಟ್ಟರು. ಅವರಿಬ್ಬರೂ ಋಷಿಗಳ ಪಾದದಲ್ಲಿ ಬಿದ್ದು ಕ್ಷಮೆಯನ್ನು ಬೇಡಿದರು. ಆಗ ಭೃಗು ಮಹರ್ಷಿಗಳು “ನೀವು ಕರಿಗಿರಿ ಕ್ಷೇತ್ರದಲ್ಲಿ ತಪಸ್ಸು ಮಾಡಿರಿ ನಿಮಗೆ ಶಾಪ ವಿಮೋಚನೆಯಾಗುತ್ತದೆ” ಎಂದು ಹೇಳಿದರು.

ದೇವದತ್ತನು ಆನೆಯಾಗಿ ಹುಟ್ಟಿ ಈ ಮಹಾ ಕ್ಷೇತ್ರದಲ್ಲಿ ತಪಸ್ಸು ಮಾಡಿ ಒಂದು ದಿವಸ ಒಂದು ದೊಡ್ಡ ಶಿಖರದಿಂದ ಕಾಲು ಜಾರಿ ಕೆಳಗೆ ಬಿದ್ದು ಆನೆಯ ಜನ್ಮವನ್ನು ಕಳೆದುಕೊಂಡು ಪುನಃ ಗಂಧರ್ವನಾದನು.

ಧನಂಜಯನು ದೇವರಾಯನ ದುರ್ಗದ  ಪೂರ್ವ ಶಿಖರದಲ್ಲಿ ಒಂದು ದೊಡ್ಡ ಕಲ್ಲು ಬಂಡೆಯಾಗಿ ಹುಟ್ಟಿದನು. ಶ್ರೀ ರಾಮದೇವರು ವನವಾಸದ ಕಾಲದಲ್ಲಿ ಸಂಚರಿಸುತ್ತ ಸೀತಾಲಕ್ಷ್ಮಣ ಸಮೇತರಾಗಿ ಈ ಕ್ಷೇತ್ರಕ್ಕೆ ಬಂದಿದ್ದರು. ಆಗ ಒಂದು ದಿವಸ ಧನಂಜಯನು ಬಂಡೆಯಾಗಿ ಇದ್ದ ಸ್ಥಳಕ್ಕೆ ಬಂದು ಆ ಬಂಡೆಯನ್ನು ಶ್ರೀ ರಾಮ ದೇವರು ತಮ್ಮ ಕೋದಂಡಾಗ್ರದಿಂದ ಸೀಳಿದರು. ಆಗ ಅಲ್ಲಿ ಧನುಸ್ತೀರ್ಥವೆಂಬ ಪುಣ್ಯ ತೀರ್ಥವಾಯಿತು. ಗಂಧರ್ವನಿಗೆ ಶಾಪ ವಿಮೋಚನೆಯೂ ಆಯಿತು.

ನಾಮದ ಚಿಲುಮೆ

ದೇವರಾಯನ ದುರ್ಗದ ಪಶ್ಚಿಮದ ಬುಡದಲ್ಲಿ “ನಾಮದ ಚಿಲುಮೆ” ಎಂಬ ಒಂದು ಪ್ರದೇಶವಿದೆ. ಇಲ್ಲಿ ಒಂದು ಚಿಲುಮೆ ಇದೆ. ಅದರಲ್ಲಿ ನೀರು ಸದಾ ಕಾಲದಲ್ಲಿಯೂ ಉಕ್ಕಿ ಬರುತ್ತಾ ಇರುತ್ತದೆ. ಶ್ರೀರಾಮ ದೇವರು ಈ ಸ್ಥಳದಲ್ಲಿ ಹಣೆಗೆ ತಿಲಕವನ್ನು ಧರಿಸಿದರು ಎಂಬುದಾಗಿ ಸ್ಥಳ ಪುರಾಣವು ಹೇಳುತ್ತದೆ.




Leave a Reply

Your email address will not be published. Required fields are marked *